Almaniyada Mixael Şumaxerin ailəsindən pul qoparmağa cəhd edən iki nəfər həbs edilib.
Şübhəlilər ictimaiyyətə açıqlanmasını istəmədikləri sənədlərə sahib olduqlarını ailəyə bildiriblər. Onların tələbləri yerinə yetirilməsə, faylları qaranlıq internetə yayacaqları ilə hədələyərək bir neçə milyon avro tələb etdikləri bildirilir.
İddialarını dəstəkləmək üçün şübhəlilər Şumaxer ailəsinə bir neçə fayl göndəriblər. Lakin ittiham tərəfi bu faylların məzmunu ilə bağlı konkret təfərrüatları açıqlamayıb.
Müstəntiqlər şübhəlilərin, 53 və 30 yaşlı Vuppertallı ata və oğulun izinə düşdülər. Hər ikisi əvvəllər törətdikləri cinayətə görə artıq sınaq müddətində idilər. Onlar iyunun 19-da Groß-Gerau şəhərində supermarketin dayanacağında tutulublar və hazırda həbsdədirlər.
Günahı sübuta yetirilərsə, onları cərimə və ya beş ilədək həbs cəzası gözləyir.
Qeyd edək ki, Mixael Şumaxer 2013-cü ildə kəllə-beyin travması alıb və o vaxtdan bəri ictimaiyyətə çıxmayıb.